Опис
Книгата „60 икони на Мајката Божја” претставува длабинска интерпретација на симболиката, стилските карактеристики и духовната димензија на иконографските претстави на Богородица, централна фигура во христијанската уметност и духовност низ вековите.
Авторката Аријан де Сен-Марк, истражувач посветена на византиската и средновековната христијанска уметност, близу две децении ги истражувала црквите, манастирите и музеите во Македонија и пошироко — од Финска до Етиопија. Нејзината цел е да се поврзат источната и западната традиција во претставувањето на Богородица и да се укаже на богатството на православното културно наследство.
Делото анализира 60 икони изработени на различни подлоги — камен, слонова коска, дрво, пергамент — низ период од VII до XV век. Десет од шеесетте претстави се од македонски цркви. На корицата е фреската „Успение на св. Богородица” од црквата „Св. Ѓорѓи” во Полошко — исклучително емотивен момент во кој Христос ја напушта својата божествена аура за да ја бакне својата мајка.
Преводот од француски јазик е дело на Тихомир Јанчовски. Македонското издание е овозможено со поддршка на Анета Антова Пешева, генерален директор во Ултра.